Ar Gedour Actualité spirituelle et culturelle de Bretagne
E dibenn miz Gouere e vo dalc’het devezhioù kristen EaT-Feiz-ha-Breizh, eus al Lun 27 (met gellout a reer en em gavout d’ar sul abardaez, a zo deiz pardon bras santez Anna Wened (oferenn vrezhonek da 9 eur…) betek ar Sadorn kentañ a viz Eost, 14 eur.
Evel warlene e roio santual Kerien-Loudieg (Querrien zo ur gêriadennig eus La Prénessaye en hanternoz Loudieg) degemer deomp el lec’h nemetañ anavezet ez ofisiel gant an Iliz e oa en em ziskouezet ar Werc’hez Vari d’ur vêsaerez vihan bouzar ha mut ha pareet anezhi.
Profitañ a raimp eus al lec’h peoc’hus-mañ, eus ar chapel gant an ofisoù a ganimp, hag a-wechoù eus an oferenn gant person Loudieg e brezhoneg.
Diouzh ar mintin e vo kentelioù e stumm kaozeadennoù : brezhoneg, hervez live an dud, kaozeadennoù war istor an Emsav, an Iliz, studiet ha desket e vo kanaouennoù. Goude merenn e vo pourmenadennoù. Beilhadegoù gant kaozioù ha c’hoarioù. Diret e vo an oberiantizoù, nemet eur ar predoù.
Un aergelc’h a vreudeuriezh kristen a ren en hon Devezhioù,a ya en-dro evel en ur familh : pep hini a gemer perzh hervez ma c’hell er gegin, er menaj, kas an dud, kas en-dro an oberiantizoù.
Marc’had mat-tre eo priz pep devezh : 35 € eo da lavaret eo 165 € evit ar chomadenn a-bezh. Distaolioù bras a c’hell bezañ graet hervez an degouezhioù (familhoù, kloer, studierien, o klask labour, hag all.), ne zle ket bezañ un abeg a virfe ouzh unan da gemer perzh.
Ma vez tud a-walc’h e vo feurmet tiez tro-dro, met ret eo deomp gouzout evit pet den.
Na dermit ket eta da lakaat hoc’h anv evit dont, laouen, da Gerien-Loudieg e fin miz Gouhere !
Titouroù : 0298251072 – 0782017315 eat@orange.fr feizhabreizh.bzh@gmail.com
Klikit amañ evit enskrivadur-devezhiou-kristen-2026.pdf
Pennad tennet eus lec’hienn Emglev an Tiegezhioù
