Distro Ar Yerigoù war Brezhoweb (Kronikenn ar sizhun)

Amzer-lenn / Temps de lecture : 2 min

Bep sizhun e vez lusket ur gronikenn gouestlet d’ar chadenn TV Brezhoweb gant Florent Grouin. Skignet e vez ar gronikenn-mañ war gwagennoù ar pemp radio e brezhoneg e-barzh an abadenn Pikouz-Dibikouz lusket gant Enora Molac. Adkavit kronikennoù ‘zo gant ur stumm skañvoc’h ha dre skrid war Ar Gedour.

Kronikenn ar Merc’her 15 a viz Gwengolo 2021

Ar sizhun-mañ ‘m boa c’hoant da lakaat ar gaoz war un dresadenn-vev e brezhoneg, pe kentoc’h ur rummad tresadennoù-bev, anvet Ar Yerigoù ! N’eo ket unan nevez, skignet eo bet war Brezhoweb e 2019 evit an distro-skol, betek penn-kentañ ar c’henfinañ e 2020. Peurliesañ e klaskomp skignañ rummadoù tresadennoù-bev nevez bep bloaz, met aze, kement a berzh en deus graet an dresadenn-vev-mañ ‘pad ar c’henfinañ, ken hon eus choazet adskignañ ‘nezhi evit ar bloavezh 2021/2022.

Istoer Ar Yerigoù

Direnket eo buhez trankil ar Yerigoù gant un den pe un darvoud dic’hortoz !

E penn-kentañ eo Ar Yerigoù un heuliad levrioù evit ar vugale, skrivet gant Christian Jolibois ha treset gant Christian Heinrich. ‘Barzh al levr kentañ e vez heuliet troioù kaer ur yarig, Karmela, hag a faot dezhi mont da welet ar mor. Karmela en em gav en Amerika ar Su mar-plij, goude ur veaj war-bourzh lestr Kristof Koulm, hag aze eo piket he c’halon gant ur c’hilhog yaouank ruz anvet Pitikok. Distreiñ a reont e Breizh evit sevel ur familh, hag al levrioù da heul hag an dresadenn-vev a zo diazesaet war o bugale Karmen ha Karmelito :

Direnket eo buhez trankil Karmen ha Karmelito gant un den pe un darvoud dic’hortoz… ha setu-int o vont da vevañ avanturioù dreistordinal evit klask un diskoulm d’an afer. Asambles gant o mignon Maoutig an dañvad, en em gavont gant harozed dibluñv iskis-mat o anvioù : Marie-Antoinette, Shakespeare, Ar C’hazh gant heuzoù ler, Yann ar Feunteun pe c’hoazh gant Leif Erikson ‘barzh rann gentañ an dresadenn-vev, ur viking yaouank hag en deus dizoloet Amerika tost 500 vloaz a-raok Kristof Koulm.

Levrioù embannet gant TES

Daouz vloaz ‘zo, pa oa bet kroget gant Brezhoweb skignañ an dresadenn-vev, e oa bet embannet levr kentañ Ar Yerigoù e brezhoneg gant TES, Ar yarig a felle dezhi gwelet ar mor. Ne oa ket bet raktreset an traoù, met klokaat a rae mat ar skignañ hag an embann war ar memes tro. Hag ar wech-mañ, c’hoazh hag adarre, ez eus daou levr nevez embannet gant TES pa grogomp da skignañ ar Yerigoù, Cholori e Ti ar Yerigoù, ha Yann o kousket ha Yann e Lenn… Ur rummad tresadennoù-bev ha tri levr, peadra da reiñ plijadur d’an holl bugale !

Sellet ouzh an dresadenn-vev (Ar Yerigoù)

Tañva Ar Yerigoù

À propos du rédacteur Florent Grouin

Trentenaire, marié, père de famille, et chrétien engagé dans la cité. Florent Grouin est impliqué dans de nombreux projets associatifs ou politiques pour la Bretagne et la promotion de la langue bretonne.

Articles du même auteur

Katekiz e brezhoneg miz Here 2023

Katekiz e brezhoneg / Catéchisme en breton (01/10)

D'ar Sul 1añ a viz Here e vo kaset un abadenn katekiz e brezhoneg evit ar vugale etre 4 ha 9 bloaz. / Dimanche 1er octobre 2023 aura lieu une session de catéchisme en breton pour tous les enfants entre 4 et 9 ans.

Un arload podkastiñ e brezhoneg gant an holl bodkastoù e brezhoneg e-barzh

Un arload podkastiñ e brezhoneg ! Une appli avec tous les podcasts en breton : (Br) Penaos kaout un arload podkastiñ e brezhoneg, gant an holl bodkastoù e brezhoneg e-barzh ? Sed aze ar pezh a ginnig deoc’h Florent. (Fr) Comment avoir tous les podcasts en breton existant, dans une appli de podcast en breton ? C'est ce que vous présente Florent.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *