Hiziv eo Sul an Drinded Santel.

Hiziv eo Sul an Drinded Santel.

N’eus ket kalz a gantikoù evit ar gouel-mañ. Setu amañ daou anezho.

Unan arall ez eus war lcc’hienn Kan Iliz (klikit amañ). 

Pedenn d’an Drinded santel

(war don Adoromp holl)

1. O Tad krouer ! C’hwi ‘gar kement ar bed-mañ

M’ho peus roet buhez ho Mab evitañ.

Grit m’ho karimp d’hon tro, eus a greiz hor c’halon

Ha m’ho meulimp ervat en Neñv dirak ho tron,

En Neñv dirak ho tron.

___________

2. O Mab Salver ! C’hwi atav madelezhus

‘Zo ‘n em c’hraet den hag a zo anvet Jezuz ;

C’hwi hoc’h eus hor prenet ‘n ur vervel war ur groaz ;

Grit na vimp ket kollet, goude poanioù ken bras,

Goude poanioù ken bras.

___________

3. O Spered Glan ! C’hwi ‘ra nerzh ha sklerijenn ;

Dirak ho tan e teuz an deñvalijenn.

Strinkit ‘n hor speredoù sklaerded ho kwirionez,

Tommit hor c’halonoù gant gwrez ho karantez,

Gant gwrez ho karantez.

___________

4. O Trinded sakr ! Hor mirit korf hag ene,

Diouzh ar gwalleur d’en em gailharañ morse,

Ma c’hellot chom ennomp, e-giz e-barzh ho ti

Ha reiñ d’hor c’halonoù ar peoc’h hag an dudi,

Ar peoc’h hag an dudi.

___________

5. Holl draoù krouet, ha c’hwi-holl sent hag Aelez,

Meulit ganeomp an Doue a santelezh.

Ra vo meulet an Tad, ar Mab hag ar Spered !

Ra vo meulet bepred tri Ferson an Drinded,

Tri Ferson an Drinded !

___________

Gwerz an Drinded

(war don Emgann an Tregont)

DISKAN :

D’an tri Ferson eus an Drinded

Kanomp ervat gant mil resped :

Gloar hag enor war bep tachenn,

Gloar hag enor da virviken !

___________

1. Un Doue ‘zo, unan hepken,

Krouer pep tra, krouer pep den ;

Bet eo atav, be ‘vo bepred,

Emañ dre holl hep harz ebet.

___________

2. Tri Ferson ‘zo e-barzh Doue,

Parfed o zri e pep doare ;

An Tad, ar Mab, ar Spered Glan,

Doue o zri, holl a unan.

___________

3. Doue o zri, ha koulskoude

‘rabat soñjal int tri Doue ;

Unan hepken a reont o zri :

N’eus etrezo tamm disparti.

___________

4. Disparti ‘bet n’eus etrezo ;

N’int ket mesket evelato :

An Tad, ar Mab hag ar Spered

A chom atav gwir Bersoned.

___________

5. Doue an Tad a zo krouer,

Doue ar Mab a zo Salver,

Hag ar Spered a garantez

Eo oberour ar santelezh.

___________

6. Doue a zo ur spered pur,

Santel, santel eo e natur,

N’heller kavout en e vuhez

An disterañ fallagriezh.

___________

7. Galloud Doue a zo dispar :

Ober a c’hell ar pezh a gar ;

An dud kreñvañ en e gichen

‘zo nebeutoc’h eget kelien.

___________

8. Douar ha mor ha bolz an Neñv

A embann sklaer galloud Doue :

E anv sakr ha benniget

Dre ar bed-holl a zo skrivet.

___________

9. Eñ eo a vlein an heol, al loar

Hag ar stered hag an douar ;

E lec’h ebet, netra morse

Ne c’hell fiñval hep e aotre.

___________

10. Emell a ra ouzh ar paourig,

Ouzh al labous hag ar peskig,

Ouzh ar preñvig an disterañ,

Emell a ra ouzh kement tra.

___________

11. Klevout, gwelout a ra pep tra,

Betek an traoù ar c’huzhetañ :

N’eus ket ur soñj en hor spered

Hag a chomfe outañ kuzhet.

___________

12. Doue a zo madelezhus

Hag ouzh an holl eo truezus :

D’ar pec’her paour, pa cheñch buhez,

E ro pardon ha levenez.

___________

13. Met Doue ‘zo ivez leal,

Ha gwazh a-se d’ar re ‘zo fall :

Gantañ pep den a vo barnet

Hervez an hent en do heuliet.

___________

14. Bevomp atav evit Doue ;

Bezomp dezhañ korf hag ene,

Hag en Neñvoù ni ‘vo laouen

Ouzh e veuliñ da virviken.

Source : Kelc’h Katolik / Son & Ton

[CC BY-NC-ND : Partage autorisé sur un autre site à condition de citer Ar Gedour en entête avec un lien cliquable. En savoir plus]