Gouel an Hollsent : war roudoù sent Breizh

Bep bloaz, d’ar 1añ a viz Du, e ped an Iliz ac’hanomp da lidañ an holl sent, ar re anavezet hag ar re arall. Gouel an Hollsent a zegas deomp da soñj n’eo ket ar santelezh un dra miret evit un nebeud tud dibar, met ur galv graet da bep kristen. Pep hini ac’hanomp, en e vuhez pemdeziek, a zo galvet da vale war roudoù ar C’hrist.

E Breizh, ez eo don roudoù ar sent en hor bro. A-hed ar c’hantvedoù o deus merket hor c’hêrioù, hor parrezioù hag hor maezioù. O anvioù a gaver war hon ilizoù, hon chapelioù, hon feunteunioù hag hon lec’hanvioù. Sant Erwan, sant Kaourintin, santez Nolwenn, sant Paol Aorelian, sant Gwenole, santez Gwenn, sant Ronan ha kement a re all a zo testoù eus ar feiz a zo bet treuzkaset a rummad da rummad.

Met pet sant all a chom dianav deomp hiziv an deiz ? Pet gwech e tremenomp dirak ur chapel hep gouzout piv eo ar sant a vez enoret enni ? Lod eus ar sent-se o deus lezet nebeut a roudoù en istor, ha diaes eo a-wechoù dispartiañ ar pezh a zo istorel diouzh ar pezh a zo deuet deomp dre an hengoun. Koulskoude, abaoe kantvedoù, o deus tud hor bro troet war-zu enno evit pediñ, goulenn sikour ha lakaat o buhez e daouarn Doue.

Pep chapel, pep pardon a zo ur bedadenn da vont war-zu ar sent-se. Pa vez douget ar bannieloù, pa sav ar c’hantikoù brezhonek ha pa vez bodet ar fideled tro-dro d’ur chapel, n’eo ket hepken un hengoun kozh a vez dalc’het bev. Ar pardon a zo da gentañ un ober a feiz, ur mare evit pediñ Doue, goulenn pardon digantañ ha fiziout en hanterouriezh ar sent.

Ret eo deomp, eta, mont pelloc’h eget mirout hon glad relijiel. Pouezus eo reneveziñ hon chapelioù, gwareziñ hon delwennoù ha derc’hel bev hor pardonioù. Met pouezusoc’h c’hoazh eo derc’hel bev ar feiz a zo bet abeg da sevel al lec’hioù-se. Petra dalvezfe kaout chapelioù kaer ma ne vije den ken evit pediñ enno ?

Sent Breizh n’int ket tud eus an amzer dremenet hepken. Skouerioù int evidomp hiziv c’hoazh. Sant Erwan a zesk deomp difenn ar re baour ha klask ar justis. Sant Gwenole a zegas da soñj deomp pegen pouezus eo ar bedenn hag ar fealded da Zoue. Ar sent o deus prezeghet an Aviel en hor bro a bed ac’hanomp da vezañ testoù eus hor feiz, gant kalon ha fiziñs.

N’eo ket ret deomp bevañ evelto pe ober an hevelep traoù hag int. Met gallout a reomp heuliañ o skouer en hor familhoù, en hol labour, en hor parrezioù hag en hon darempredoù gant ar re all. Rak ar santelezh a grog alies gant traoù simpl : reiñ amzer d’un den a zo en diaester, pardoniñ, sikour ar re wan, pediñ ha chom feal d’an Aviel.

Da geñver Gouel an Hollsent, kemeromp amzer da anavezout gwelloc’h sant patron hor parrez pe ar sant a zo dediet dezhañ ar chapel nesañ deomp. Deskomp o istor d’hor bugale, distroimp d’hor pardonioù ha lakomp hor sent da vezañ kompagnuned a bedenn evidomp.

Rak n’eo ket gouel an amzer dremenet eo Gouel an Hollsent, met gouel an esperañs. Ar sent a ziskouez deomp ez eo posupl heuliañ ar C’hrist, amañ hag hiziv, war an douar-mañ ma’z omp bet ganet hag e-touez an dud a zo tro-dro deomp.

Ra vo sent Breizh sklerijenn war hon hent, ha ra vo hon chapelioù hag hor pardonoù lec’hioù ma kendalc’ho ar feiz da vevañ ha da vezañ treuzkaset d’ar rummadoù da zont.

Gouel an Hollsent laouen deoc’h !