PEDERIEN AR MENEZIOÙ DU

Lennet war lec’hienn  Ya !

Lann Anna, ur plas war ar maez, a ‘z eer di gant un hent a gas d’ar parkeier. Un dachenn vras, ul liorzh vras, un ti bihan kinklet brav, gant arrebeuri simpl hag un tamm mod-kozh. Izeloc’h, kant metr pelloc’h dismantroù tiez kouezhet en o foull, bet renevezet gant ar gumuniezh ha gant sikour ur mañsoner. “Diouzh ar skoazell arc’hant a vez roet deomp gant hor mignoned, ha diouzh an amzer hon eus ez a ar chanter en-dro.” eme Benead, eus Douarnenez, unan eus an tri gwaz a gont ar gumuniezh. Evit poent n’eo bet echuet nemet ar chapel, gouestlet da Santez Anna, hag ar sakristiri stag outi. Chom a ra c’hoazh tri savadur all, renevezet tamm pe damm. “Goude e c’hellimp degemer tud, ar pezh a zo dibosupl deomp evit poent. Met n’ez a ket buan. Dre chañs hon eus mignoned a c’hell sikour.” a gendalc’h paotr Douarnenez.

Digoust 

Gant Benead ez eus ivez Fulub, eus Zinzag-Lokrist ha Gweltaz, eus Ploermael. Brezhoneg a vez ingal ganto. Brezhoneg ivez a implijont evit reiñ kentelioù a-zehou hag a-gleiz. E tiez ar re gozh e labouront ivez, evit gounit peadra da vevañ, en ur mod simpl kentoc’h. Klask a reont sevel ul lec’h bevañ kristen ha breizhek war-un-dro “Re a labour en diavaez a virfe ouzhomp da gas hor c’hefridi da benn.” eme Fulub a-raok displegañ danvez ar garg-se, reneveziñ ar c’hantikoù a vez implijet e eskopti Gwened, kas da benn enklaskoù istorel. “Kalz labourioù a reomp evit kas war-raok ar feiz, ar ouiziegezh, ar yezh met ne vez ket tennet gounid eus ar pezh a reomp. N’omp ket gwerzhourion ha re alies e chom frouezh hol labourioù hag hon enklaskoù divrud.” eme Benead. Met n’int ket direnket gant kement-se. Ober o zreuz en un doare uvel, hep direnkañ na klask trouz ouzh den, a seblant bezañ o ger-stur, memes ma santer un tamm dipit eus o ferzh pa gomzont eus tro-spered Iliz Breizh hag hini tud ar vro.

Follentez 

“Follentez eo, evit gwir.” a anzav Benead. Met padout a ra o istor, bet kroget e 89 gant galv ar pab Yann-Baol ll da vare ar JMJ e Kompostella. D’ar poent-se e oa-eñ studier ha souezhet gant emzalc’h gallgar ar birc’hirined. Hag eñ gant kamaraded da sevel un delwenn da Santez Anna – “met kalz brasoc’h eget ma oamp e soñj, evit gwir” – bet benniget div wech gant ar pab, bet lakaet da dreiñ eus an eil parrez d’eben dre ar vro goude ar JMJ. Nepell goude e loc’hent gant o breuriezh.

Daoust dezho ren ur vuhez uvel e-kreiz ar vro emaint e-liamm gant ar bed, gant o blog ha zoken gant Facebook. Evel-se emaint e darempred gant tud er bed a-bezh.