Ar Gedour Actualité spirituelle et culturelle de Bretagne
Bep sizhun e vez lusket ur gronikenn gouestlet d’ar chadenn TV Brezhoweb gant Florent Grouin. Skignet e vez ar gronikenn-mañ war gwagennoù ar pemp radio e brezhoneg e-barzh an abadenn Pikouz-Dibikouz lusket gant Enora Molac. Adkavit kronikennoù ‘zo gant ur stumm skañvoc’h ha dre skrid war Ar Gedour.
Kronikenn ar Merc’her 2 a viz Meurzh 2022
Ar sizhun-mañ ‘m boa c’hoant da lakaat ar gaoz war ur rummad tresadennoù-bev nevez da welet war Brezhoweb. Arzhur ha bugale an Daol-Grenn, ha n’eo ket Arzhur ha marc’heion an Daol-Grenn, rak a-raok bout marc’heion kalonek ha dizaon, e oa Arzhur hag e vignoned bugale evel ar re all.
An dresadenn-vev a heul troioù-kaer Arzhur yaouank, hag a teuio da vout Roue Breizh un deiz bennaket, hag e vandennad vignoned, bodet tro-dro d’an Daol-Grenn. Stourm a reont a-enep enebourien a bep seurt, hudourien, erevent, aveit gwareziñ ar c’hastell Kameled, ar c’hleze Kalet-Voulc’h – Excalibur e galleg ma faot deoc’h – hag ar Roue Uter.
Skignet ‘vo 2 rann nevez bep sadorn war Brezhoweb, e-pad ur bloaz., hag e vo 52 rann da welet. Lakaet eo bet ar rann 1añ en fe fezh war YouTube. Un dresadenn-vev evit ar vugale adalek 8 vloaz, pe 9 bloaz lakaomp.
Arzhur ha bugale an Daol-Grenn, Mojennoù Breizh
Bout ‘zo un dra nevez en ur mod gant an dresadenn-vev-mañ, An aergelc’h, pe an tem ma faot deoc’h, hag a denn deus Breizh. Aze gant Arzhur ha bugale an Daol Grenn hon eus, evit ar wech kentañ marteze, un dresadenn-vev hag a lak war-wel Mojennoù hor bro.
Adkavet e vo razh an traoù liammet gant Mojennoù Arzhur, an tudennoù evel-just, evel Guenièvre a zo deuet da vout Gwenivar pe an hudour Marzhin ‘vel just, met ivez lec’hioù ‘zo evel an Draonienn hep distro pe c’hoazh ar c’hleze mojennek Kalet-Voulc’h.
Ur meskaj etre avanturioù, Mojennoù, met istoer ivez, peogwir e vo un digarez evit ar vugale da zeskiñ traoù diwar-benn ar C’hrenn amzer, prantadoù kompliket evel ar brezelioù, pe an naonegez ‘barzh ar vro.
Lakaet ‘oa bet war-wel an dresadenn-vev-mañ war Ar Gedour ar sizhun tremenet gant Erwan, Arzhur ha bugale an Daol-Grenn / Dessin animé en breton.
Sellet ouzh rannoù Arzhur ha bugale an Daol Grenn
