C’hoant ho peus da labourat evit Brezhoweb ? (Kronikenn Brezhoweb ar sizhun)

Bep sizhun e vez lusket ur gronikenn gouestlet d’ar chadenn TV Brezhoweb gant Florent Grouin. Skignet e vez ar gronikenn-mañ war gwagennoù ar pemp radio e brezhoneg e-barzh an abadenn Pikouz-Dibikouz lusket gant Enora Molac. Adkavit kronikennoù ‘zo gant ur stumm skañvoc’h ha dre skrid war Ar Gedour.

Kronikenn ar Merc’her 8 a viz Gwengolo 2021

C’hoant ho peus da labourat evit Brezhoweb ? Posupl eo ! Emaomp o klask war-lerc’h unan bennak evit kreñvaat ar skipailh. Ar post kinniget a zo ur post skoazeller war ar produiñ, da lâret eo unan bennak hag a sikouro da broduiñ abadennoù, da skignañ anezhe, met ivez unan hag a eskemmo gant hor c’hevelerion, hag unan gouest da istitlañ videoioù e brezhoneg hag e galleg.

N’eo ket ret anavezout bed ar c’hleweled, dizoloet ‘vo tamm-da-tamm, met ret eo bout en e vleud gant ar yezh, dre gomz ha dre skrid, ret eo bout en e vleud gant ar bed niverel, ar meziantoù boutin hag ar rouedadoù sokial.

Perak klask war-lerc’h un den nevez ?

N’omp ket niverus a-walc’h evit ober tout ar pezh a faotfe deomp ober

Tri ‘bloaz ‘zo hon eus cheñchet penn d’ar vazh gant Brezhoweb. Chomet omp a-sav gant abadennoù mod kozh, doare “Bec’h De’i”, an talk-show e brezhoneg, “C’hoari ha deskin” ur c’hoari tele, pe c’hoazh ar sport skignet war-eeun e brezhoneg. An abadennoù a-seurt-se na glokae ket mui gant ar pezh a oa o c’hortoz an dud, ha dreist-holl ar re yaouank.

Ijinet hon eus ha produet hon eus abadennoù modernoc’h hag a ra berzh doare « Tuto Breizh », « Pennad Kaoz », « 4/13 munud e Breizh », pe c’hoazh « Made e Breizh » skignet nevez ‘zo.

Ne glaskomp ket produiñ muioc’h a eurvezhioù, met produiñ abadennoù a-vremañ ha skignañ anezhe e pep lec’h. Skignañ a gemer muioc’h mui a amzer, ret eo kempenn an abadennoù evit skignañ gant doareoù a bep seurt, war lec’hienn Brezhoweb, youtube, facebook, twitter hag Instagram.

Ar pezh zo diaes hiziv an deiz eo tapout an dud e pep lec’h, met ret eo ober memes tra. Hag abalamour d’an dra-se hon eus ezhomm muioc’h a dud ‘barzh ar skipailh, evit skignañ hon abadennoù ha brudañ anezhe. Muioc’h-mui a labour a vez ganeomp, met n’omp ket niverus a-walc’h evit ober tout ar pezh a faotfe deomp ober.

Kinnig Labour

Kefridi :

• Eskemm gant kevredigezhioù
• Sikour da broduiñ abadennoù
• Heuliañ an abadennoù
• Steuñviñ skignañ Brezhoweb
• Istitlañ videoioù
• Kinnig abadennoù a c’haelfe bout graet ivez.

Lec’h : An Alre
Kevrat labour : 80% pe leun-amzer

Barregezhioù :

• Live Brezhoneg C1, brezhoneg a-vro Gwened a vefe degemeret mat.
• En e aes a-fed darempredoù gant an dud.
• En e aes gant ar binvioù niverel (Ofis..) hag ar rouedadoù sokial.

Kontant da labourat e brezhoneg evit ar brezhoneg, kasit deomp ho CV hag ul lizher.
Mont e darempred gant : contact [arobase] brezhoweb.bzh