Ar Gedour Actualité spirituelle et culturelle de Bretagne
Bep sizhun e vez lusket ur gronikenn gouestlet d’ar chadenn TV Brezhoweb gant Florent Grouin. Skignet e vez ar gronikenn-mañ war gwagennoù ar pemp radio e brezhoneg e-barzh an abadenn Pikouz-Dibikouz lusket gant Enora Molac. Adkavit kronikennoù ‘zo gant ur stumm skañvoc’h ha dre skrid war Ar Gedour.
Kronikenn ar Merc’her 22 a viz Gwengolo 2021
Ar sizhun-mañ ‘m boa c’hoant da lakaat ar gaoz war un abadenn produet gant Brezhoweb, Toutouig hec’h anv. Toutouig a zo ur programm berr, ur vunutenn bep rann dre-vras, evit sikour treuzkas ar brezhoneg e-touez ar familhoù.
Petra eo Toutouig ?
Rimadelloù pe kanaouennoù evit sikour treuzkas ar brezhoneg e-touez ar familhoù, gant arzourien ar vro !
Gant pep video e vo kinniget ur rimadell pe ur ganaouenn. Bewech e vo kinniget is-titloù evit sikour an dud izel o live yezh. Tresadennoù ha skeudennoù infografiezh a vo kavet ivez evit ma vo pedagogeloc’h c’hoazh ar programm.
Mesk-ha-mesk e vo kavet kanaouennoù evit luskellat ar babigoù, evit lakaat ar vugale da c’hoari gant o bizied pe d’ober anaoudegezh gant o c’horf, met ivez divinadelloù, kanaouennoù evit dasparzh ar c’hoarerien ‘barzh ar porzh-skol, kanaouennoù pe rimadelloù da zeskiñ al lizherennoù, ar sifroù, ha dreist-holl da zeskiñ penaos c’hoari gant ar yezh.
Ur gwir deñzor e vo an holl abadennoù-se evit lakaat ar vugale da vout gwriziennet ‘barzh ar vro. A-benn ar fin, ar pezh a faot deomp ober eo reiñ d’ar re o deus ezhomm alc’hwezioù pinvidik hag aes d’ober gante evit krouiñ pe kreñvaat al liamm etre un den gour hag ur bugel dre ar brezhoneg.
Gant piv e vo kinniget Toutouig ?
Ne vo ket kinniget Toutouig gant unan deus skipailh Brezhoweb, a-wechoù e vez choazet unan bennak resis evit kinnig un abadenn, Dewi pe Klaris da skouer, met amañ hon eus graet ur choaz disheñvel evit meur a abeg :
- Da gentañ e faote deomp e c’haelfe ar sellerien en em anavezout evel e-barzh ur melezour, da lâret eo kaout tud a bep seurt, a bep oad, a bep seurt pouez mouezhioù gante.
- Choazet hon eus ivez lakaat ar pouez war kalite ar yezh, se zo kaoz e vo kinniget pep video gant ur brezhoneger a dalvezo da skouer evit ar pezh a sell ouzh an taol-mouezh, an distagadur hag an ereadurezh.
Setu perak e vo kinniget ar videoioù gant un dek den bennaket, arzourien ar vro anezhe, filmet e pep-lec’h e Breizh. Mesk-ha-mesk e vo klevet Elsa Corre, Gael Lorcy, Eric Menneteau, Jean-Claude Ruyet, Mona Jaouen, Daniel Giraudon, Bleuenn & Gireg Konan, Sklaerenn Ar Galloudek, Yolaine Delamaire hag Henri Morvan.
